قلب السبيل.. قصيدة بالعامية المصرية
محمد ربيع محمد | شاعر مصري وعضو اتحاد الكتاب
مبقاش بعيد الهجر عن شوقك
والسكه من كتر الحفر
مفهاش مسار واحد سليم
لميت شواشي النخل فوق زندك
ملقتش عرجون الرطب تجنيه !!!
ولا شفت بعنيك القمر….
فارد شعاعه المبتسم
على ناصية الليل البهيم
والأرض بتنبت بشوك
طالع ف حلقي بيرسمك أشباح
تاهت طيور الصبح…..
وانتشر العويل
وجبال كتير استأسدت
حاجبة شعاع الشمس…
عن عين الطريق
مليت وضاق الصدر
ف الصحرا البراح
وجمال بترمح م العطش
كسرت بخف الهروله قلب السبيل
ولا باقي ف عيونك بريق
للفرحة ف مواسم حصاد
غير شرخ بيشق الخدود
علشان ما يطلع منه بركان القلق
ياما كنا بنحني الخطاوي بالأمل
والحلم كان مالي السنابل بالربيع
شجرة محبتنا اللي غطاها الورق
واتدلى من بينها الحرير
كشفت غصونها المثمرة للريح
عريانه في حضن الخريف
كل العشوش اتسرسبت
ماعادتش تقوي بين كفوفها الطير
متعلقين ف رهان هزيل
بيجر حيل العجز ويلف التراك
بدموع غزيرة بتلطتم بالسور
كسر المونع معجزه علشان يعديها
والحظ مش هاضم السبق
ملقاش اغاني ملهمه علشان يغنيها
ايه اللي ناوي تحصله
من وهم سابح ف السحاب
خفافيش وطايره ف السما
حلت مكان سرب الحمام
صافية السما؟؟؟
أبداً ضناه الغيم
والمزن عاصي ع الجواب
كان نفسي أصلي
افرش بساطي ف الهوى
على أرض مشتاقه
تشعر بافراح السجود
وتجود بروح الورد
ومزيد من الطاقه
