هرولة
محمد ربيع محمد | اتحاد كتاب مصر
مبقاش بعيد الغزل من نولك
والسكه من كتر الحفر
مفهاش مسار واحد سليم
لميت شواشي النخل فوق زندك
ملقتش عرجون الرطب تجنيه !!!
ولا شفت بعنيك القمر….
فارد شعاعه المبتسم
على ناصية الليل البهيم
والأرض بتنبت بشوك
طالع ف حلقي بيرسمك أشباح
تاهت طيور الصبح…..
وانتشر العويل
وغيوم على سطح الحياة
حاجبة شعاع الشمس…
عن عين الطريق
مليت وضاق الصدر
ف الصحرا البراح
وجمال بترمح م العطش
كسرت بخف الهروله قلب السبيل
ولا باقي ف عيونك بريق
للفرحة ف مواسم حصاد
غير شرخ بيشق الخدود
علشان ما يطلع منه بركان القلق
ياما كنا بندادي خطاوينا بامل
والحلم كان مالي السنابل بالربيع
شجرة محبتنا اللي غطاها الورق
واتدلى من بينها الحرير
كشفت غصونها المثمرة للريح
عريانه في حضن الخريف
كل العشوش اتسرسبت
ماعادتش تقوي بين كفوفها الطير
متعلقين ف رهان هزيل
بيجر حيل العجز ويلف التراك
بدموع غزيرة بتلطتم بالسور
كسر الموانع معجزه علشان يعديها
والحظ مش هاضم السبق
ملقاش أغاني ملهمه علشان ياديها
ايه اللي ناوي تحصله
من وهم سابح ف السحاب
خفافيش وطايره ف السما
حلت مكان سرب الحمام
صافية السما ولا فيش ف شوقها غيوم
واحنا اللي تايهين ف الدروب
ولا عادش ماء المزن يتهجى الدموع
كان نفسي تتوضى الجوارح
من نهر حلم بيغسل البدن اللي غطاه الشرود
على أرض بتحنى الكفوف
لحظة ملاد البسمة …..
على وش الشروق
