زجل الشعراء
رضا علي أحمد أبو شنب | مصر
م الشعراء ويارب ارحمنا
خلو دماغنا تمللي تدور
اللي تمللي راسملي المدنة
واللي ينقط وسط طهور
واحد يرسم لينا الجنة
حبة ورد وفيها زهور
يرسم آدم ومعاه حوا
راسم حتي بنات الحور
لما تدور تلقي سيادته
دايما واقف وسط طابور
وبيتمشي في قلب الجزمة
وبيتشعبط في الحنطور
يزرع ورد في قلب الميه
يفضل طول العمر يشور
كل ما يسمع كلمه يقولها
ويلخصها في ست سطور
لما يطلع منها المعني
بيقدمها بكل غرور
لابس بدلة معاها الجزمة
فاكر نفسه الواد مشهور
لما تفكر تسمع منه
تلقي الطابق كان مستور
واحد يشكي العيشة المرة
يلعن فيها مليوووون مرة
ليه يازماني تزيد الكسرة
وتدوبني في كاس الخمرة
تدي لغيري الجنه في ايده
وبتديني في ايدي الجمرة
واحد حاله بيشكي الدنيا
ومن الغدر بيقول خاينة
مهما تعمرها. وتبنيها
زي ماتيجي بتمشي في ثانيه
ليه الدنيا عليا تجور
ليه بتطفي عليا النور
كل ما بزرع فيكي الورد
دايما تطلع ارضك بور
كل ما اقول ايام وتعدي
يصبح يومي بست شهور
واحد تاني يغني لليلي
صوتك شعرك عينك هايله
نفسي اضمك وتضميني
بس ياروحي الايد مش طايله
قومي اتوضي بدموع عينيي
خلي دموعي تخش الجنة
طول الوقت بيمدح فيها
كل ما اشوفه احس بخايله
لما بتزهق منه وتبعد
راح يشتمها ويقول خاينه
ويقول كانت غلطة وعدت
يخلص منها يروح للتانية
اصل الشعر شعور متبادل
نوصف بيه الحالة المايلة
يا اهل الشعر دماغنا وجعنا
ليل ونهار صوتكم صدعنا
خلي حروفكم تفخر بيكم
وادو كلامكم دايما معني
تبقو ضمير العقل وصوته
لو هتضحو معاه وتموتو
دايما حب الله يجمعنا
خليك فاعل مش مفعول
او بالجر تكون مكسور
ارفع راسك جوه بلادك
ابني لخوفك مليون سور
اياك مرة تقوم بالثورة
او بالقرعة تمد لبره
خلي حياتك لاجل بلادك
دايما تفضل بلدك حره
خليك شمعه تنور بلدك
لو هيطفو علينا النور
م الشعراء ويارب ارحمنا
خلو دماغنا تمللي تدور
