سوق التلات
محمود مرعى | مصر
يا آخر براءه
في عمر الحجات
يا آخر حصار
الكلام للسكات
يا دمع الحيارى
يا حزن العذارى
وآخر محطه
وحطه يا بطه
يا ملح انسكب
يروى نبع الآهات
فحجاكم الله
وهاتوا الودان
وركز معايا
هنا الترجمان
حيروى الحكاوى
ويهدى الغناوى
ويبدأ معاكم
بسرد البيان.
1
بياع خضار
انتبه انه عايش
فشد الملامح
وجاب الغوايش
وشخلل لبنت
المعلم حمام
رمى ف حجر أبوها
عرق عمر عاشه
وكام حلم شافه
وعن جوفه حاشه
وطبل وزغرد
ولم الجيران
وتجرى الليالى
كما الألعوبان.
2
وهذا حموكشه
بياع جرايد
مهاود وصوته
كطبل الموالد
يجعر ينعر
ويرجع بكوموه
ورق كان أساسًا
بديل عن هموموه
فيجلس يطالع
حكاوى الشَمال
وكام حرب قامت
وكام شهريار
هرب بعد قطف
الزهور الجُمال
ولا عمره فكر
في كدب الخلايق
وكل اللى جوه الورق
ده حقايق
ويحلف برحمة أبوه اللى كان
وأمه اللى باعت
صفوف اللبان
بصدق الجرايد
وكل اللى هاجم
حروفها مُكايد.
3
وطله بفرحه
على قلوب جميله
على عم صالح بتاع البليله
بطل خاض حروبه
جساره وإيمان
وعلم وكبر
ورغم الهوان
بيضحك كأنه
أمير الزمان
وينده…….. بليله
لذيذه وأصيله
يا طعم الليالى
وروح الميدان
وتهجم قلوب الزباين أمم
وتهتف ليسقط
قطيع الرمم
وتاكل وتدعى
وتهدر وتنعى
وتشبع وترجع
لحجر الصوان.
4
ولازم نفكك
لهيب الدروب
ونهجر ملاذ
الخضوع والهروب
ونبحث عن الروح
………………..
في قلب المسارح
فهذا الغلام
اللى خاشع وسارح
وشعره كأنه
كنافة رصيف
تطاول ومدد
على عود آراك
يمثل كلام الفلاسفه القدام
تحدث وعبر
حتى أراك
فيسرح
ويضرب بخيل الخيال
ويرجع يدَّوب
صنوف المحال
ويحكى كأنه
سياسي قرارى
عن عمر ولّى
وعن عمر حالى
يِنظَّر يقارب
وتسأل يجاوب
وعارف دا عارف
مسالب مقالب
وكام فرد هارب
بقوت الخلايق
وكام فرد ناهب
وكام فرد غاصب
وآكل وشارب
وكوش ما سايب
لغيره سبيل
وإذا جيت تناقشه
في أي قضية
تلاقيه يفند
بمليون دليل.
5
كانت دروب الوحده
خلف خلاف
بص القزين
على ورده مقطوفه
ملس عليها
وشد كام شوفه
خدها الحنين
لبست بياض التوب
جريت عليه
نادى ف سمار الريح
بياع خضار
وبجملة المجاريح
لمست ايديك
شوك الزهور يا حزين
غمض عنيه
واتحنَّى بالصبار
كان الولد سريح
شارب مرار البوح
نادى كتير وقليل
عافر تكون له روح
ورور خضاره عجب
جرجير يا طالب النسب
مجنونه بنت الكلب
قوطه بياضها نسيم
ليه تبتدى التقاسيم
بمحاورة الأموات
لو تبتدى الترسيم
ارسم خطوط بالطول
امسح خطوط العرض
اروي تقاوي الشجن
سمد عويل الأرض
هات الحمار كفنه
وابني عليه قبه
واهى كبه ورا كبه
لو تفهم اللبه
حتعيش عليل القلب
فكفايه قسمه وضرب
وعيشها على كيفها.
6
حاضن براح الأمكنه
ومحاوط التباريح
مادد جدوره
في ألف أرض وأرض
يقطف مرار الأسئله ويبوح
فدان يروح
كأنه فقد العرض
يزرع ويحصد
حتى لو كان شوك
حزمة بصل
الفول لأهل الله
العدس للصايمين
يخرج ويدخل
في المعصره ما يهاب
إلا اللى رازقه
قوته وسط الشعب
شايل على كتفه اليمين خُضره
ضهره انحنى
لكن بقلب شباب
ينده…………
بصل المحب
الخضره للهانم
أخضر يا فول
الخس للقمرات
خيره تشوفه
قِبله للأغوات
لكن فِصالهم
يحزن الأموات
بجنيه بنص
بخمسه لأ بتنين
ويبيع حليب العين
بالبخس للبهاوات
وف آخر السهرات
لجلن نكون بشوات
نسيب فوق الحساب
ميات ورا ميات
لكنه راجع
كأنه باع
جني البلاد كله
يدخل محمل
للولاد أحمال
جبرنا يا سيده
فين العيال تاكل
ويحط خير ربنا
ويحمد اللى هداه.
