الترجمة فراشه طايره بين الألفاظ.. عامية مصرية
نهال محسن | شاعرة عامية ومترجمة مصر
الترجمة ماهْياش لفظين
تبدل فيهم بين لغتين
ماهْياش تغيير بين كلمات
دي فن و روح ، تبادل ثقافات
تستمتع وانت بتديلها
بعيوبها و بِمِيزاتها قابلها
راضي تضَيَّع فيها ساعات
ما تحس كام من وقتك فات
فراشه طايره بين الألفاظ
صنايعي و صنعتك ألماظ ؟
وهتدور علي ايه تاني
دي صنعه ريسها عناني؟
ده الترجمه موضوع حيوي
الترجمه دي سلاح نووي
الغرب يكتب، واحنا نرد
هما يشوطو فينا ، واحنا نصد
ده ماتش داير ، و هات وخد
ترجم عجمي ، و ترجم ديني
ترجم طبي ، قانوني ، تحريري
ترجم .. ترجم
فك الطلسم
سمع صوتك كل العالم
ما تسيب قلمك
إملا ورقتك
و ماتنسي انك بني آدم
خلقك ربك لجل تعمَّر
تزرع خير ، ترجم ، كتَّر
دي الترجمه روح و عقيده
دي موهبه ونعمه فريده
بحورها غويطه
ماهياش لفظين
تبدل فيهم بين لغتين
^^^
الاختلاف حكمه، والترجمه عباده بنقر بيها بالحكمه دي.
بنتعرف علي شعوب وقبائل وبنتعارف و بنوصل صوتنا ليهم ونسمع بيها صوتهم.
ترجموا
