قِسمه كسبّانه

رشا فؤاد | شاعرة وفتوغرافية مصرية

بتغزل حبها

بكمادات الوهم على جرحه

فتمشى زى الشريك المخالف ع الوجع

واحد صحيح

فى القسمه ع الماضى

لحاضر مابيصبحش على بكرة

غير بدم…..

من تحت صوت الضحكه جوع

ماسك ضفيرة….

مجدول نصها بالناس

(ماتبعدوش عن بعض بالساهل )

وكأن آخر الضفيرة

بشر …تسريحه للشارع………………

لموا طرف عنيكوا ف بعضها بالحب

دا القمح لسه بين دموعكوا

بيتسلى بالحواديت

عشق الوشوش الطين

حلم بتعدى……..

تسابيحه جوه الوقت

تشفى التراب م الموت

أصل الخطاوى

ف تعويذة فرح

كرباج…..

بيسلم اللحظه

وكأن الأسر ..واجب مقدس

لإكتمال حالة الدوخه

بوهم إنى….

خايفه أضحك بالسخريه علنى

ليحلوا دمى ف النتيجه صفر

وأنا اللى طول عمرى

بالم الدنيا على حيلى

عشان ارتاح

ماتعرفوش قسمه كسبانه

الله…………….

سكتوا ليه….

دايرين فى تنورة الحياه

من غير حدود …..

طب ما الأيدين

ناويه ترمى ….. بين خطوطتها

كدبة الكف القديمه ….

ونس كان دايما بيشغى فيه الدود

على باب الخروج للموت

ومن ساعتها

مفيش شريك مخالف ع الوجع واحد صحيح